Халықаралық сот: Израиль Рафахтағы әскери операциясын дереу тоқтатуы керек

24 мамырда Халықаралық сот Израильге Газа секторының оңтүстігіндегі Рафахтағы әскери операциясын тоқтатуға бұйрық берді, деп хабарлайды Orda.kz.       

Euronews хабарлағандай, бұл ретте сот Оңтүстік Африка өткен аптада өткен сот отырысында талап еткендей, бүкіл анклав аумағында толық атысты тоқтатуды талап еткен жоқ.

«Атысты тоқтату талабы өткен жылдың соңында Оңтүстік Африканың Израильді Газа секторындағы әскери операциясы кезінде геноцид жасады деп айыптаған істің бір бөлігі. Израиль бұл айыптауларды үзілді-кесілді жоққа шығарады. Істің шешілуі бірнеше жылдарға созылуы мүмкін, бірақ Оңтүстік Африка  құқықтық даулар жалғасып жатқанда палестиналықтарды қорғау үшін уақытша мүмкіндік қарастыруда» делінген хабарламада. 

БАҚ атап өткендей, Израиль сот шешімін орындауы екіталай, дейді сарапшылар, бірақ бұл елге қысымды күшейтеді. Израильдің Газа секторындағы әрекеттеріне қатысты - тіпті оның ең жақын одақтасы АҚШ тарапынан да сын күшейіп келеді. Дегенмен Израиль жер бетіндегі ешбір күш елдің өз азаматтарын қорғауына және Газа секторындағы ХАМАС-ты қудалауына кедергі келтірмейтінін айтады.

Бұдан бұрын хабарланғандай, Америка президенті Джо Байден мәлімдеме жасап, онда Америка Құрама Штаттары Газа секторында болып жатқандарды геноцид деп санамайтынын және Халықаралық қылмыстық соттың бас прокурорының Нетаньяхуға тағылған айыптарын жоққа шығаратынын атап өтті.