Халық банкі Қырғызстандағы еншілес ұйымын сатты

Халық банкі Қырғызстандағы еншілес банкінің 100% акциясын сату бойынша мәміленің жабылғанын хабарлады.

KASE мәліметі бойынша, 18 сәуірде Халық банкі өзінің еншілес ұйымы «Халық Банк Қырғызстан» ААҚ-ны сату бойынша мәміленің аяқталғаны туралы хабарлады. Оның Қырғызстандағы еншілес компаниясының барлық акциялары Visor International DMCC инвестициялық тобына кіретін сатып алушылар консорциумының билігіне берілді.

«Visor Group» «Halyk Bank Kyrgyzstan» ААҚ-ты дербес заңды тұлға ретінде қалдыруды жоспарлап отыр және Қырғызстандағы дамуын жалғастырады» деп келтіреді KASE Халық банкінің ресми мәлімдемесін.

Forbes мәліметінше, Visor инвестициялық тобын Қазақстандағы ең бай және ықпалды бизнесмендердің бірі Айдан Кәрібжанов басқарады.

Халық банкінің Visor тобымен көрші елдегі еншілес қаржы институтын сату туралы келісімге келгені 2023 жылдың соңында белгілі болды. Қазақстанның Халық банкі бұл мәміле Қырғызстан Ұлттық банкінің мақұлдауын күтті.