Халық банкі Құлыбаевтар компаниясына 193 миллиард теңгеге жуық дивидендт төлейді

Халық банкі 277 миллиард теңгеден астам дивидендтер төлеуге шешім шығарды. Оның шамамен 193 миллиард теңгесін Тимур Құлыбаев пен оның жұбайы – экс-президент Нұрсұлтан Назарбаевтың қызы Динара Құлыбаева басқаратын «ALMEX Holding Group» АҚ алады. 

«Қазақстан Халық Банкі» АҚ 2024 жылғы 25 сәуірде өткен сырттай дауыс беру арқылы банк акционерлерінің жылдық жалпы жиналысында банктің 2023 жылғы қызметінің нәтижелері бойынша банктің жай акциялары (ISIN KZ000A0LE0S4) бойынша дивидендтер төлеу туралы шешім қабылданғанын хабарлады: бір жай акцияға есептелген дивиденд мөлшері: 25,43 теңге; дивидендтерді төлеудің басталу күні: 2024 жылғы 3 маусым; дивидендтерді төлеу тәртібі мен нысаны: күн басындағы жағдай бойынша дивидендтер алуға құқығы бар акционерлердің тізімін жасау күні (00.00) 2024 жылғы 15 мамыр (Алматы уақыты); Дивидендтерді төлеу нысаны қолма-қол ақшасыз. Банк акционерлеріне төленетін дивидендтердің көлемі 277 397 404 056,36 теңге болды» деп хабарлады жұма күні Қазақстан қор биржасы (KASE). 

2024 жылғы 1 сәуірдегі жағдай бойынша Халық Банкі жай акцияларының 69,52%-ы ALMEX холдингтік тобына тиесілі. Осылайша Құлыбаевтар компаниясы 192,8 млрд теңге дивиденд алады.