«Халықаралық қауымдастық бізге көмектесуі керек»: Талибан өкілі мәлімдеме жасады

Ауғанстан билігін қолына алған талибандар есірткі өндірісін тоқтатып, орнына егін егетіндерін айтты. Қазақстанда тыйым салынған экстремистік ұйым «Талибан» қозғалысының ресми өкілі Забихулла Муджахид мәлімдеме жасады.

Бұл туралы Orda.kz хабарлайды.

Забихулла Муджахидтің айтуынша, елде әйелдер құқығын шектеу, оларды басыну азаяды. Әйелдерге білім алуға, ерлермен тең жұмыс істеуге рұқсат берілмек. Бірақ, тек шариғат бойынша. Ең бастысы, есірткі және қару-жарақ саудасына тыйым салатындарын жариялады. Есірткінің орнына егін егіп, бақша дақылдарын сатумен айналысуға ниетті.

– Отандастарымызды, әйелдер мен халықаралық қауымдастықты біз ешқандай есірткі шығармайтынымызға сендіреміз. Бұдан былай Ауғанстан есірткісіз елге айналады, бірақ оған халықаралық көмек қажет болады. Халықаралық қауымдастық бізге балама дақылдарды өсіруге көмектесуі керек, - деді Забихулла Муджахид.

Бірқатар өзгерістер жасауға ниетті болған талибандар бұқаралық ақпарат құралдарының жұмысына еркіндік беретіндерін айтты, тек шариғат заңдылықтарына қарсы шықпау керек және ислам дінін қараламау қажет.