Халыққа көмек қолын созған Құрмет Талапқазы «Құрмет» грамотасымен марапатталды

ҚР Ауыл шаруашылығы министрлігі Ербол Қарашөкеев биыл жазда құрғақшылық салдарымен күресіп, халыққа көмек қолын созған Құрмет Талапқазыны «Құрмет» грамотасымен марапаттады.

Марапатты министрдің өзі Құрметпен кездесіп, табыстаған.

«Құрметтің есімі мұқым қазаққа белгілі. Маңғыстауда мал қырылып жатқанда барша қазақстандықтарға үндеу тастап, игі бастаманы қолға алды. Министр Құрметтің бастамасын қолдап қана қоймай, оны жүзеге асыруға көмектескен болатын. Шабылған шөпті Маңғыстауға жеткізу үшін әкімдіктермен, ҚТЖ сынды басқа да мекемелермен келіссөз жүргізіп, ведомство тарапынан қажетті қолдауды көрсетті. Бүгін сәті түсіп, шаруалармен кездесу барысында жүзбе жүз көрісті. Қазақта бас көтеретін, ауылдың мәселесіне бей-жай қарамайтын азаматтар көп болсын!» деп жазды Ауыл шаруашылығы министрлігінің баспасөз хатшысы әлеуметтік желіде.

Еске салсақ, Шымкент қаласының 25 жастағы тұрғыны Құрмет Талапқазы биыл Маңғыстауда мал қуаңшылыққа тап болғанда, қоғамдық жұмыспен айналысқан.

Жақында Құрмет Шымкенттегі ЖОО біріне тегін оқуға мүмкіндік алды.