Халыққа автобусқа отыр деген сарапшы лауазымынан айрылды

Газ бағасына наразы қазақстандықтарға қоғамдық көлікке көшуге кеңес берген Олжас Байділдинов энергетика министрлігіндегі «Adaldyq Alańy» жобалық кеңсесінің басшысы қызметінен кетті.

Жоба кеңсесінің басшысы болып министрліктің әдеп жөніндегі уәкілі Ерлан Сәрсекеев тағайындалды.

Еске салсақ, Орталық коммуникациялар қызметінде өткен брифингте мұнай-газ саласының сарапшысы Олжас Байділдинов бензин, дизельдік отын және сұйытылған газ бағасының қымбаттауына қарсылық білдіріп жатқандарға қатаң сын айтты.

Сарапшы жанар-жағармай құнын нарық анықтайтынын және жалақы мен табысқа байланысты емес екенін атап өткен болатын.

– Бұл бағаларға көңілдерің толмаса, кез-келген уақытта қоғамдық көлікті пайдалана аласыздар. Сол да проблема ма?, – деген болатын Олжас Байділдинов.

Сол кездегі энергетика министрінің штаттан тыс кеңесшісі айтқан сөзі видео арқылы әлеуметтік желіде тарап, халықтың наразылығын тудырды. Жұрт жанар-жағармай қымбаттаса, азық-түлік бағасы да көтерілетінін жазып жатыр.

Энергетика министрлігі Байділдиновтің олардың ведомствосына еш қатысы жоқ екенін атап өтті.