Хакерлер шабуылына ұшыраған қазақстандық БАҚ ҰҚК-ге жүгінді

Мәлімдемеге қол қойғандар арасында Kursiv.Media, Inbusiness.kz сайты, ProTenge және Airan жобаларының өкілдері, блогер Асхат Ниязов және басқа да БАҚ өкілдері бар.

Қазақстандық БАҚ желтоқсан айының соңында өткен кеңестің қорытындысы бойынша Ұлттық қауіпсіздік комитетіне мәлімдеме жасады. Онда бұқаралық ақпарат құралдары мен IT секторының өкілдері кибершабуылдардың жиілеуі және олардан қорғану мүмкіндіктерін талқылады.
Бүгін медиа саласының өкілдері кибершабуыл мәселесін талқылау үшін тағы да бас қосты. Нәтижесінде Мәдениет министрлігімен және Цифрлық даму министрлігімен, сондай-ақ халықаралық ұйымдармен байланыс орнату туралы шешім қабылданды.

Естеріңізге сала кетейік, қазақстандық БАҚ-қа кибершабуылдар өткен жылдың желтоқсан айында басталған болатын. Бұл туралы бірінші болып ҚазТАГ, Курсив және ProTenge айтты. Қаңтарда «ОБОЖАЮ» жобасының авторы Асхат Ниязов ресурстарына шабуыл жасалғанын жариялады.