«Хабар» мен КТК телеарналарының иелері ауысады – дереккөз

Қазақстанның медиа нарығында үлкен өзгерістер болады. Киселев «Еуразия» арнасынан кетіп, «Хабар» мен КТК иелері де ауысады деп күтілуде.

Бұл туралы ҚазТАГ агентігі хабарлайды.

«Наурызда «Еуразия бірінші арнасының» бас директоры Сергей Киселев ауысады деп күтілуде. 2007-2010 жылдар аралығында арнаны басқарып, 2012 жылы арнаны қайта басқарған Киселев Қазақстанның экс-президенті қызы Дариға Назарбаеваға жақын» деп хабарлады дереккөз.

Сондай-ақ, тағы бір дереккөздің айтуынша, «Хабар» телеарнасы президент әкімшілігі құрылымдарының бірі – Орталық коммуникациялар қызметі немесе президенттік телерадиокешені құрамына кіреді.

Дәл осы дереккөздің хабарлауынша, КТК телеарнасын «Тұңғыш Президент «қорынан шетел азаматтығы бар қазақстандық тау-кен олигархтарының бірі сатып алмақ.

Айта кетейік, «Еуразия бірінші арнасы» телеарнасының 80 пайызға жуығы «Қазақстан» республикалық телерадиокорпорациясы» мемлекеттік акционерлік қоғамына тиесілі. Ашық деректерге сәйкес, КТК-ның негізгі акционерлері Тұңғыш Президент қоры (акциялардың 91,35%) және «Медиа-Инвест» ЖШС (5,81%). Телеарнаның үлестес тұлғаларының бірі – Дариға Назарбаева.

Бұған дейін хабарлағандай, Дариға Назарбаеваның 18 ақпанда Алматыдағы КТК телеарнасына барғаны туралы ақпарат болған, бірақ арнаның өзі бұл ақпаратты жоққа шығарды.