Гүлмира Сатыбалдыға қатысты тағы бір қылмыстық іс қозғалды

Қайрат Сатыбалдының бұрынғы жұбайы Гүлмира Сатыбалдыға қатысты тағы бір қылмыстық іс қозғалып, тергеу жүріп жатыр, деп хабарлайды Orda.kz.

Бұл туралы Сыбайлас жемқорлыққа қарсы іс-қимыл агенттігі «ҚазАқпараттың» ресми сауалына жауап ретінде мәлім етті.

«Қазақстан Республикасының Сыбайлас жемқорлыққа қарсы іс-қимыл агенттігі (“Сыбайлас жемқорлыққа қарсы қызмет”) “VOSTOCHKA” көпфункционалды тұрғын үй кешенінің құрылысы кезінде орын алған заңсыз әрекеттерге байланысты Г.К.Сатыбалды мен өзге де тұлғаларға қатысты қылмыстық істі тергеп жатқанын хабарлайды», деп жазылған ведомствоның ресми мәліметінде.

Агенттік тергеу мүддесіне байланысты өзге мәліметтер жарияланбайтынын атап өтті.

Еске сала кетейік, 2024 жылдың тамыз айында Гүлмира Сатыбалды орташа қауіпсіздік деңгейіндегі мекемеде 12 жылға бас бостандығынан айырылған болатын.