Гүлмира Сатыбалдының ісі: сотталушы жәбірленушілерге өтемақы өндіріп бермек

Бүгін Астанада Байқоңыр ауданының №2 сотында экс-президент Нұрсұлтан Назарбаевтың бұрынғы келіні Гүлмира Сатыбалданың ісі бойынша басты сот отырысы басталды.

Гүлмира Сатыбалды адам ұрлады және озбырлық жасады деп айыпталуда. Онымен бірге жүргізушісі және ықтимал орындаушысы да сотталушылар қатарында отыр. Зардап шеккендер – белгілі кәсіпкер Тұрсен Алагузов пен «Maxi Bottlers» ЖШС-нің бұрынғы иесі Айгүл Мекешева.

Сот отырысында Алагузовтың адвокаты Ақмарал Бұралхиева Гүлмира Сатыбалдының шығынды өтеп, медиациялық келісім жасасуға әрекеттенгенін айтты.

— Сотқа дейінгі тергеп-тексеру барысында сотталушы Сатыбалды келтірілген шығынды өтеуге әрекет жасады. Қазіргі уақытта, дәлірек айтқанда, соттың алдын ала отырысынан кейін медиациялық келісім талаптары бойынша келісімге келдік,- деді адвокат.

— Бұл медиациялық келісім менің қорғауымдағы Алагузовқа ғана емес, жәбірленуші Мекешеваға да қатысты. Оған қол қоюға уақыт керек,- деді қорғаушы.

Қазіргі уақытта сот процесі жүріп жатыр.