Грузияда тұтқындалған Михаил Саакашвили аштық жариялады

Грузияға келісімен қолға түскен Михаил Саакашвили аштық жариялап, Украина консулымен кездесуді талап етті. Ол 1 қазан күні Грузияда ұсталған болатын.

Бұл туралы қоғамдық қорғаушы Нино Ломджария Грузияда ұсталған экс-президентпен кездесуден кейін айтты, деп хабарлады Orda.kz ақпараттық порталы Грузия Online сайтына сілтеме жасап.

Ломджарияның айтуынша, Саакашвили өзін саяси тұтқын санайды және өзіне шығарылған үкіммен келіспейді.

Михаил Саакашвили сегіз жылдан кейін туған жеріне оралғаны туралы өзінің Facebook парақшасында жазған болатын.

Халық қорғаушысы Саакашвили тұтқындау кезінде құқық қорғау органдары қызметкерлерінің әрекеттеріне наразылық танытпағандығын, есікті өзі ашып, кіргізгенін мәлімдеді.

Саакашвилидің адвокаты Пека Басилая оны кешіріммен босатуға болатынын айтты. Дегенмен Грузия президенті Саломе Зурабишвили Саакашвилиге кешірім берілмейтінін мәлімдеді. 

Михаил Саакашвили 6 қыркүйекте Facebook парақшасында  2 қазанға белгіленген жергілікті өзін-өзі басқару органдарына сайлауға дейін Грузияға оралуға ниетті екенін жеткізген.

Ол Грузия екі рет қатарынан – 2004 -2013 жылдары президенті қызметін атқарды. Ол өз елінде түрлі қылмыстық құқық бұзушылықтары үшін алты жылға бас бостандығынан айрылып, ішкі іздеуде жүрген.