Грузияда қайтыс болған Әселдің анасы күйеу баласының жазаланғанын қалайды

Грузияда қайтыс болған  Әсел Айтпаеваның анасы тергеудің әділ болуын талап етуде. Қыздың анасы — Айсұлу Айтпаева  бұл іске Әселдің күйеуінің де қатысы бар деп күмәнданады. Себебі Грузияға қызын алып барған оның күйеуі.

Бұған дейін терезеден секіріп кетті делінген Әсел Айтпаеваның өліміне күдікті ретінді  Грузия азаматы қамауға алынғанын хабарлағанбыз. Оны зорлау мен адамды өзіне қол жұмсауға жеткізу әрекеті үшін жазаға тартпақ. Ал Әселдің анасы күйеу баласы да жазалануы керек деп есептейді.

— Әселді күйеу бала алып кеткен. Сол күні Қазақстаннан әртүрлі рейспен бес қызды жіберіпті. Ал Әсел қайтыс болған күні ол Нұр-Сұлтанға ұшып келді, - дейді Айсұлу Айтпаева.

Оның айтуынша, күйеу баласы неге екені белгісіз Грузияда тегін ауыстырып жүрген.

 — Мен Әселдің өліміне дейін түнгі сағат он бір жарымда қызыммен сөйлескенмін. Сол кезде соңғы рет тілдестік.  Қызым маған бәрі жақсы екенін айтты. Бірақ мен оның даусынан бір нәрсеге алаңдап тұрғанын сездім. «Көмек, болмаса ақша керек пе?» деп сұрадым. Оның жанында біреу болған сияқты, - дейді Әселдің анасы.

Әселді Грузияға көлік алып-сататын бір фирмаға жұмысқа шақырған екен. Бірақ күйеу баласы оны алдап кетіпті.

— Менде аудиожазбалар бар. Жазбада бір ер адам қызымның үстіне қайнаған су құямын деп қорқытады. Сосын  «секір, секір» дейді. Қазір Грузияда біреуді күдікті ретінде ұстапты. Бірақ мен күйеу баламның жазаланғанын қалаймын. Сонда ол түк болмағандай жүруі керек пе ? Ол да, оның туыстары да кешірім сұраған жоқ, - дейді анасы.

Әселдің анасы күйеу баласының  кесірінен қызы зорлық-зомбылықтың құрбаны болғанын айтып, оның жазаланғанын қалайды.