Грузия Ресейге қарсы санкцияларға қатысудан бас тартты

Грузия билігі Батыстың Украинадағы жағдайы аясында Ресейге салған экономикалық және қаржылық санкцияларын қолдамайды. Бұл туралы Грузия премьер-министрі Ираклий Гарибашвили мәлімдеді.

ТАСС агенттігінің хабарлауынша, премьер-министр Тбилиси халықаралық серіктестердің әрекетін қадағалап отырғанын, бірақ оларды қолдаудан бас тартатынын алға тартты.

«Мен Грузияның біздің ұлттық мүдделерімізді ескере отырып, қаржылық және экономикалық санкцияларға қатыспайтынын анық айтқым келеді» деді ол.

Бұған дейін Украина президенті кеңсесі басшысының кеңесшісі Михаил Подоляк Киев оның қауіпсіздігіне кепілдік болса, Мәскеумен бейтарап статус туралы келіссөздер жүргізу дайын екенін мәлімдеген.

Еуроодақ (ЕО) елдерінің басшылары Донбастағы әскери операцияға жауап ретінде үшінші санкциялар пакетін әзірлеп жатыр.

Еске салсақ, 24 ақпанда Ресей президенті Владимир Путин Донбаста арнайы әскери операция жүргізу туралы шешім қабылдаған. Украина лидері Владимир Зеленский Ресей Федерациясымен дипломатиялық қарым-қатынасты үзетінін мәлімдеді. Киев Мәскеуден елшілік қызметкерлерін эвакуациялауды бастады.