«Грекиядағы өртке қатысы бар»: Экс-министр Сүлейменовтің қызы Ресей азаматтығынан бас тартты

Елдегі ең бай әйелдердің бірі, олигарх Данияр Әбілғазиннің жұбайы Айдан Сүлейменова ресейлік төлқұжатынан бас тартуға шешім қабылдады.

11 шілдеде Ресей президенті Владимир Путин «Ресей азаматтығына қабылдау және Ресей азаматтығынан шығу туралы» жарлыққа қол қойды. Құжатқа сәйкес, төрт адам ресейлік төлқұжаттан бас тарту туралы өтініш берген. Олардың арасынан Сүлейменова да бар.

Айдан Сүлейменова - елдегі ең бай әйелдердің бірі. «ADD Invest Properties» ЖШС басқарушы компаниясы арқылы Құлыбаевтармен бірге Астанадағы «Керуен», «Керуен сити» және «Талан галереясы» атты бірнеше сауда және ойын-сауық орталықтарына иелік етеді.

Сонымен қатар, кәсіпкер әйел Қазақстанның бірінші сыртқы істер министрі Төлеутай Сүлейменовтің қызы және қазақстандық Forbes нұсқасы бойынша ең бай бизнесмендер тізімінде тұрған Данияр Әбілғазиннің әйелі.

23 маусымда Грекияда абайсызда өрт қойды деген күдікпен сотқа 13 адам келген, Олар қазақстандық бизнесмендердің бірі Данияр Әбілғазиннің қонақтары екені белгілі болды. Өрт Гидра аралындағы жалғыз қарағайлы орманды шарпыған, өрттің шығуына туристер тобы демалып жатқан элиталық яхтадан атылған отшашу себеп болған. 22 маусымда алты тікұшақ пен екі өрт сөндіру бригадасының көмегімен өрт сөндірілген кезде шамамен 1,2 мың гектар орман алқабы өртке шарпылған болатын.