«Грант сатқан»: Таразда колледж директоры парамен ұсталды

Таразда колледж директоры студентті мемлекеттің гранты арқылы оқыту үшін пара алған, деп хабарлайды Orda.kz. 

Тараз қаласы №2 сотында колледж директоры А. мен пара берді деп айыпталған сотталушы Ш.-ға қатысты қылмыстық іс қаралды. 

Мәліметтерге сүйенсек, 2024 жылдың қыркүйегінде колледж директоры өзінің қарамағындағы оқытушы - азаматша Ш.-дан «ақпараттық қамтамасыз ету» мамандығы бойынша ұлын грантқа түсіру үшін 80 мың теңге көлемінде пара алған. 

Оның кінәсі іс бойынша жиналған дәлелдемелермен, яғни сотталушылардың, куәлердің айғақтарымен, тінту хаттамасымен, құпия тергеу құжаттарымен және басқа да заттай дәлелдемелермен дәлелденді.

Колледж директорына мемлекеттік қызметте лауазым атқаруға өмір бойына тыйым салынып, параның 25 еселенген сомасы, яғни 2 млн. теңге мөлшерінде айыппұл тағайындалды. Ш.-ға - мемлекеттік қызметте лауазым атқаруға өмір бойына тыйым салынып,  параның 15 еселенген сомасы, яғни 1,2 млн. теңге мөлшерінде айыппұл салынды.