Головкиннің жаттықтырушысы Қазақстанның ұлттық құрамасына қызметке келді

Америкалық жаттықтырушы Кристофер Камачо Геннадий Головкинмен соңғы жекпе-жектерде жұмыс істеген. Енді ол Қазақстанның бокс құрамасына қосылды, деп хабарлайды Orda.kz.

Енді ол халықаралық аренадағы спортшылардың физикалық дайындықтарына жауап береді. Камачоның тек Головкинмен ғана емес, Хабиб Нурмагомедов, Даниэль Кормье сияқты әлемдік спорт жұлдыздарымен де жұмыс істегені белгілі.

Бұл туралы спорт журналисі Аслан Қаженов өзінің instagram парақшасында пікір қалдырды.

«Қазақстандық кәсіпқой боксшы Геннадий Головкиннің физикалық даярлығына көмектескен Кристофер Камачо Қазақстанға келді. Америкалық маман енді бокстан ұлттық құраманың физикалық дайындығына жауапты болады. Камачо Головкиннен бөлек Хабиб Нурмагомедов, Кейн Веласкес, Даниэль Кормье, Люк Рокхолд пен Брэндон Адамс секілді мықтыларға да көмектескен. Өте жақсы жаңалық. Қазақстан бокс федерациясының президенті Шахмұрат Мүтәліп отандық боксқа реформа қажет деп еді. Сол үлкен өзгерістердің бастамасы деп үміттенеміз. Сәттілік!», — деді Аслан Қаженов.