Головкин мен Бас прокуратура меморандумға қол қойды

ҚР Ұлттық Олимпиада комитеті мен Бас прокуратура спорт саласындағы заңдылықты қамтамасыз ету туралы меморандумға қол қойды, деп хабарлайды Orda.kz Olympic.kz сайтына сілтеме жасап.

«Бас прокурор Берік Асылов пен Ұлттық Олимпиада комитетінің президенті Геннадий Головкин қол қойған келісімнің мақсаты – спорт саласындағы заңдылықты нығайту, бюджет қаражатының ұрлануы мен басқа да қылмыстардың алдын алу, салауатты өмір салтын насихаттау, әсіресе жастар арасында нашақорлықтың алдын алу», деп мәлімдеді Олимпиада комитетінің баспасөз қызметі.

Тараптар болашақта құқық қорғау органдары қызметкерлері арасынан көрнекті спортшыларды тәрбиелеу үшін құқық қорғау органдарында спортты насихаттау бойынша бірлескен жұмыстар мен ортақ жобаларға келісті.

Бас Прокурор Мемлекет басшысының тапсырмаларын орындау аясында уәкілетті органмен бірлесе отырып, кәсіби спорттағы маңызды мәселелерді шешуге және саладағы заңнаманы жаңартуға мүмкіндік алатынын атап өтті.

Бұған дейін ҰОК ҚР Ішкі істер министрлігімен спорт пен салауатты өмір салтын насихаттауға, сондай-ақ елдегі олимпиадалық қозғалысты нығайтуға бағытталған ынтымақтастық туралы келісім жасасқан болатын.