Головкин мансабын аяқтайтыны туралы мәлімдеме жасады

Қазақстандық боксшы Геннадий Головкин мансабын аяқтағаны туралы мәлімдеме жасады.

Sports.kz хабарлауынша, Головкин шетелдік БАҚ өкілдеріне берген сұхбатында қашан мансабын аяқтайтыны туралы айтты.

«Мен барлық қабылдаған шешімдерім дұрыс деп ойлаймын – мансабымды әрі қарай жалғастырғым келе ме? Егер мен мансабымды аяқтағым келсе, бұл да дұрыс шешім болады. Қазір маған бәрі ұнап тұр және мен жасаған барлық нәрсе мен үшін дұрыс болатынына сенімдімін» деді Геннадий Головкин.

Өз кезегінде, америкалық бокс шолушысы және itrboxing.com сайтындағы подкаст авторы Люк Кетелл қазақстандық әлем чемпионының мансабын аяқтайтын кез келді деп есептейді.

«Шынымды айтсам, Головкин мансабын аяқтайды деп үміттенемін. Оның «Канелодан» кейінгі мансабының екінші жартысы ыңғайсыз болды және ол есте қалатын нәрсе емес. Тым көп жалғасы бар жақсы фильм сияқты» деді Люк Кетелл.

Айта кетсек, GGG сәуірде 40 жасқа толады. Ол IBF және IBO тұжырымдары бойынша орта салмақтағы әлем чемпионы.

Бұған дейін Геннадий Головкин желтоқсан айында орта салмақта үш әлем чемпионы атағы үшін жапониялық Риота Муратаға қарсы жекпе-жекке шығады деп жоспарланған болатын. Алайда 29 желтоқсанда өтуі тиіс жекпе-жек кейінге шегерілді. Оған себеп Жапонияда COVID-19-ға байланысты енгізілген жаңа шектеулер. Енді жекпе-жек ақпан айында өтуі мүмкін.