Головкин «Канеломен» жекпе-жегінен 37 млн доллар таза пайда көрді

Boxingnews24.com порталының спорт шолушысы Анхель Флауэрс отандасымыз Геннадий Головкин мен мексикалық боксшы Сауль Альварестің қаржылық жағдайын салыстырды. Сонымен қатар ол қос боксшының жекпе-жек үшін қанша табыс тапқанын да айтты деп хабарлайды Sports.kz.

Журналистің айтуынша, қазақстандық боксшының қаржылық  жағдайы Альвареспен өткізген екі жекпе-жектен кейін арта түскен.

— Головкиннің қаржысының 90 пайыздан астамы оның Сауль Альвареске қарсы өткізген екі жекпе-жегінен түскен. Қауесеттерге сенсек, GGG-дің жеке капиталы 30-35 млн долларға дейін жетеді. «Канеломен» өткен екі кездесу Головкинге 37 млн доллар таза пайда әкелген. Салыстыру үшін Альварес Авни Йылдырыммен болған соңғы кездесуінде 20 млн доллар және Каллум Смитпен болған кездесуінде де осынша ақша тапты, - деді Анхель Флауэрс.

Геннадий Головкин мен Сауль Альварес арасындағы алғашқы жекпе-жек 2017 жылы болып, кездесу тең есеппен аяқталған болатын. Бір жылдан кейін тағы жекпе-жек өткізіліп, мексикалық спортшы төрешілер шешімімен жеңіске жетті.

Бұған дейін Головкиннің келесі жекпе-жегі мексикалық Хайме Мунгиямен өтетіні хабарланған. Кейіннен кездесу өтпейтіні белгілі болды. ESPN телеарнасының журналисі Бернардо Пилаттидің ойынша, Мунгияның промоутері оны Геннадий Головкинге қарсы шығаруды өте қауіпті деп санаған сияқты.