Үңгірден шыққан ұлттың өкілімін – Уәлибек Әбдраимов

Әлуметтік желілерде тараған бейнежазбада «Шаншар» театрының директоры Уәлибек Әбдраимов Дәурен Абаевтың «жабайы ұлтшылдық» туралы айтқанына жауап берді.

Танымал әзілкеш бейнежазбаны Берлиндегі Рейхстагта түсірді. Оның айтуынша, Дәурен Абаевтың сөздерін көтере алмаған.

– Дәурен мырза, менің сіздің саясатыңызда шаруам жоқ. Сіз біздің Қазақстанда 90% орысша сөйлейді дедіңіз. Ал қанша пайыз қазақша сөйлейтінін айтпадыңыз? Орысша сөйлейтін 90%-ға мақтанып тұрсыз, ал өз ұлтыңыздың тілін неге солай көтермейсіз? – деді Әбдраимов.

Сонымен қатар, Уәлибек Әбдраимов Берлинде ту тіккен Рақымжан Қошқарбаев пен дәл осы қалада жерленген Мұстафа Шоқайды еске алды.

– Осылардың аруағынан ұят болды-ау, сізге. Мен сізге қызметіңізді ауыстырыңыз деп айта алмаймын. Өйткені сіз ауыстырмайсыз бәрібір. Сіздер сол қызмет үшін өмір сүресіздер, ұлт үшін емес, - деді Шаншар театрының директоры.

Сөз соңын Уәлибек Әбдраимов өзін «үңгірден шыққан ұлттың өкілімін» деп аяқтады.