Германияда қолтырауынның басын сақтап жүрген қазақстандық ұсталды

Германияда Қазақстаннан Ресейге миллиондаған долларға жуық заңсыз жеткізілімге күдікті адамның үйін тінту барысында крокодилдің басы табылды, деп хабарлайды Orda.kz Bild басылымына сілтеме жасап.

Неміс кеденінің ақпаратына сәйкес, 39 жастағы қазақстандық Гессен аумағының солтүстік бөлігінде тұрған. Санкцияларды айналып өтіп, ол үшінші елдерді, соның ішінде Қазақстанды пайдалана отырып, Ресейге ондаған премиум санатындағы автомобильдерді, мотоциклдер мен квадроциклдер жеткізген. Экспорттың жалпы құны шамамен 25 миллион еуроға бағаланады.

«Тұрғын және коммерциялық үй-жайларды тінту барысында күдіктіден 1,3 миллион еуроға бағаланатын 21 көлік құралы, допинг препараттары, тыйым салынған электрошокер, сондай-ақ  крокодилдің кесілген басы тәркіленді» деп жазылған хабарламада. 

Кеденнің мәліметінше, ер адам санкцияны кем дегенде 700 рет бұзған.

Естеріңізге сала кетсек, Еуроодақ 2022 жылы Украинадағы соғыс басталғаннан кейін Ресейге қарсы бірқатар тауарларды экспорттауға қатаң шектеулерді қоса алғанда, ауқымды санкциялар енгізген болатын.

 ЕО Ресейге люкс санатындағы автомобильдерді, микрочиптер мен алмастарды экспорттауға тыйым салды. Қара тізімге әскери және қосарланған мақсаттағы өнімдер, дрондар мен авиациялық бөлшектер, сән-салтанат заттары, мұнай-газ саласына арналған автомобильдер мен техника, әскери салада қолданылуы мүмкін белгілі бір химиялық заттар, композиттер мен өнеркәсіптік материалдар да кірді.

Санкциялар Ресейге тікелей жеткізілімге ғана емес, егер шектеулерді айналып өтуге күдік болса, үшінші елдер, соның ішінде Қазақстан, Армения және БАӘ арқылы транзитке де тыйым салады.

Биылғы сәуір айында Қытай СІМ Украина президенті Владимир Зеленскийді Ресейге қару-жарақ жеткізу бойынша  айыптауын «негізсіз» деп атады және қақтығысты тоқтатуға ниетті екенін мәлімдеді.