Германияда кезектен тыс парламент сайлауы өтті

Германияда кезектен тыс парламент сайлауы өтіп, ФРГ канцлері Олаф Шольц сайлауда жеңілгенін мойындады, деп хабарлайды Orda.kz. 

Германияда Бундестаг сайлауында алдын ала мәліметтерге сәйкес, ХДО/ХСО бірлескен блогы жеңіске жетті.

Федеральдық сайлау комиссиясының мәліметінше, Фридрих Мерц бастаған «Христиандық-демократиялық одақ» пен «Христиандық-әлеуметтік одақ» 28,6% дауыс жинады. Жексенбіге дейін блоктың сенімді түрде жеңіске жетерін әлеуметтанушылар болжап,  кейін экзитполда растады. 

Орталық сайлау комиссиясының мәліметінше екінші орындағы «Германия альтернативасы» 20,8% сайлаушы дауысын жинаған. Бұл - партияның ең жақсы көрсеткіші, Алис Вайдельдің партиясы Бундестагтағы депутаттарын екі еселеуі мүмкін.

Олаф Шольц жетекшілік ететін социал-демократтар үшінші орында, алайда бұл олар үшін ең нашар көрсеткіш. Сайлаушылардың 16,4%-ы ғана дауыс берген. Шольц сайлауда жеңілгенін мойындап, өте төмен көрсеткіш үшін қынжылыс білдірді. 

«Жасылдар» 11,6%, Солшыл партиясы 8,8% дауыс жинады.