Газада ауруханада болған жойқын жарылыстан 500 адам қаза тапты

Израильдің Газа секторындағы ауруханаға жасаған соққысынан кемінде 500 адам қаза тапты.

Бұл туралы Палестина эксклавының денсаулық сақтау министрлігі хабарлады.

Хамас мәлімдемесінде ауруханада жүздеген науқас пен жаралы бар екенін айтты. Оның ішінде үйлерінен күштеп көшірілгендер де бар. Хамас бұл оқиғаны «әскери қылмыс» деп атады. Палестинада үш күндік қаралы күн жарияланды.

«Палестина мемлекетінің басшысы Махмуд Аббас Газа секторындағы әл-Ахли ауруханасына израильдік әуе шабуылдары құрбандарын еске алу үшін үш күндік аза тұту жариялап, қайғының белгісі ретінде туларды жартылай түсіруді бұйырды» делінген президент баспасөз қызметінің хабарламасында.

Өз кезегінде Израиль қорғаныс күштерінің баспасөз қызметі Газадағы ауруханалардың бірінде болған күшті жарылыс Палестина анклавынан сәтсіз зымыран ұшырудың салдары деп сендірді. Ведомствоның мәліметінше, бұған «Ислам жиһады» ұйымы жауапты.

«Әртүрлі дереккөздерден алынған барлау мәліметтері Газадағы ауруханаға сәтсіз атылған зымыран ұшыруға Исламдық жиһадтың жауапты екенін көрсетеді» делінген хабарламада.

Еске салайық, 7 қазанда Хамас күштері Израильге бірнеше мың зымыран атып, «Әл-Ақса тасқыны» операциясының басталғанын хабарлаған болатын. Мыңдаған содырлар Израиль аумағына басып кіріп, ондаған әскери техниканы және жүзден астам адамды кепілге алды. Салдарынан Израиль премьер-министрі Нетаньяху елдің соғыс жағдайында екенін мәлімдеді.

ЦАХАЛ-дың жауап беру операциясы «Темір қылыштар» деп аталды және оның мақсаты  Хамасты жою.