Газа секторындағы жасөспірімдер 

Газа секторындағы балалар Израиль соғысы кесірінен білім ала алмай жатырмыз деп күйінеді.

Бұл туралы Al Jazeera хабарлады.

«Емтиханды асыға күттім, бірақ соғыс бәрін тоқтатып, бұл қуанышымыздан айырды. Басында соғыс бір күні бітеді, оқуда үлгеріп, өзге қатарластарымызды қуып жетеміз деп үміттендік. Бірақ бұл соғыс қанша уақытқа созылатынын және ол бізді білімнен қанша жылға айыратынын білмейміз», — деді Газаның оңтүстігіндегі Хан Юнистен қоныс аударған 18 жастағы студент Бараа әл-Фарра.

«Осы емтиханды тапсырып, университетке оқуға түсеміз, бақытты боламыз деп 12 жыл күттік. Бірақ мына қарғыс атқан соғыс бізді бәрінен айырды», — деді 18 жасар Лилиана Нихад. Ол да Газа қаласына Хан Юнистен көшіп келді. 

БҰҰ Білім кластері ұйымы осы айдың басында Газадағы мектептердің 75%-дан астамы толық қайта жөндеуді қажет ететінін анықтаған. Газа білім министрлігінің мәліметінше, білім беру нысандарының 85 пайызы жұмыс істемейді.