Газа секторында Израиль мен Хамас арасындағы бітім аясында алғашқы кепілге алынғандар босатылады

Израиль мен Хамас арасындағы бітім бүгін басталады. Төрт күндік соғыс қимылдарын тоқтату кепілдегілерді айырбастау және Газа секторына гуманитарлық көмек жеткізуге жол ашады деп хабарлайды Orda.kz.

Катар Сыртқы істер министрлігінің ресми өкілі Маджид бен Мұхаммед әл-Ансаридің айтуынша, Газа секторында Хамас содырлары кепілге алған алғашқы топ жұма күні жергілікті уақыт бойынша сағат 16:00-де босатылады.

«Бірінші топ, оның ішінде 13 әйел мен бала сағат 16.00 шамасында тапсырылады. Егер кепілге алынғандар арасында бір отбасы мүшелері болса, олар бірге босатылып, осы бірінші топқа қосылады», - деді әл-Ансари Дохадағы баспасөз мәслихатында.

Катар дипломаты сонымен бірге гуманитарлық бітім аясында босатылуы тиіс адамдар тізімі келісім тараптарына берілгенін растады. Ол келісім шарттары өзгеріссіз қалғанын, төрт күн ішінде кепілге алынған 50 израильдіктің босатылуынан үмітті екенін айтты. Кепілге алынғандарды босату процесіне Халықаралық Қызыл Крест комитетінің өкілдері қатысады.