Газа секторынан 40 қазақстандық эвакуацияланды

13 қараша күні кешке Газа секторынан 40 қазақстандық және олардың төрт отбасы мүшесі эвакуацияланды.

Бұл туралы брифингте Сыртқы істер министрлігінің ресми өкілі Айбек Смадияров мәлім етті. Дипломаттарымыздың күш-жігерінің арқасында бір сағаттан кейін Рафак бекеті арқылы Қазақстан Республикасының азаматтарын эвакуациялау басталады. Ол жерден олар Каирге барады. Қазір Сыртқы істер министрлігі отандастарды Каирден Қазақстанға жеткізу жолдарын іздестіріп жатыр. Бірақ, Смадияров нақтылағандай, ең бастысы, біздің азаматтар Газа секторынан кетеді.

«Бүгін біздің азаматтарды Газа секторынан эвакуациялау процесі басталды. 44 азаматтан тұратын бірінші топты эвакуациялау 13 қарашаға жоспарланған. Оның құрамында 40 Қазақстан азаматы мен төрт шетелдік бар, бұл олардың отбасы мүшелері. Біздің елден басқа, эвакуацияланғандардың арасында тағы тоғыз елдің өкілдері бар: Марокко, Иордания, Ресей, Испания, Швеция, Перу, Нидерланды, Ұлыбритания және АҚШ. Бүгінгі күні Рафак пункті арқылы барлығы 594 адамды эвакуациялау жоспарлануда, оның ішінде 44 азаматымыз (40 қазақстандық және олардың төрт отбасы мүшелері)» деді Смадияров.

Ол Мысырға тек Қазақстан азаматтарының кіруіне рұқсат беретінін, бірақ олардың отбасы мүшелері палестиналық болса, көбіне оларды кіргізбейтінін түсіндірді.

Бұған дейін Сыртқы істер министрлігі Газа секторында 161 адамның отбасы мүшелерімен бірге 76 қазақстандық бар екенін хабарлаған.