Газ бағасы төмендесін: Ақтаулықтар Тоғжановпен келіссөз жүргізуге дайын
Шерушілер Orda.kz тілшісіне берген түсініктемесінде вице-премьер Ералы Тоғжановпен келіссөз жүргізуге дайын екендіктерін, бірақ баға 50 теңгеге дейін төмендейтіні туралы хаттама көрсетілгенше алаңда болатындарын атап өтті.
Ералы Тоғжанов – сұйытылған газ бағасының қымбаттауына наразылық білдірген Маңғыстау тұрғындарымен 4 қаңтарда Ақтауға ұшатын үкіметтік комиссияның жетекшісі.
Ақтау мен Жаңаөзендегі наразылық шаралары 3 қаңтар күні таңертеңнен бастап үздіксіз өтіп жатыр.
Жаңаөзендік белсенділер Ақтау алаңында өткен бейбіт шеруде наразыларға қосылды. Олар Жаңаөзен тұрғындарының үш талабын айтты:
- Барша қазақстандықтар мен билік өкілдері олардың талаптарын естуі үшін Ақтаудағы алаңда интернет жұмысын жандандыру.
- Газ бағасын 50 теңгеге дейін төмендету.
- Жалақыны көтеру және тұрғындардың әл-ауқатын жақсарту.
Алаңның ортасына шыққан тағы бір белсенді журналистерге бұрылып, олар биліктен тәртіп сақшыларын үйлерінің маңайынан шығаруды талап етіп отырғандарын айтты. Оның айтуынша, алаңда сөз сөйлегеннен кейін наразылық білдірушілердің үйлері полиция қызметкерлерімен қоршалған.
4 қаңтар таңға жуық наразылық білдірушілер алаңда сенбілік өткізуді ұйғарды. Олардың айтуынша, осылайша, «ешбір прокурор оларды кінәлі танып, қамауға ала алмайды». Orda.kz тілшісінің айтуынша, бұл кезде алаңда 300-400-дей адам болған. Бұған дейін күндіз алаңға жиналған халық саны әртүрлі деректер бойынша 4 мыңға жуық адамға жеткен.
Не болды?
2 қаңтар Батыс Қазақстанда наразылық толқыны өтті. Жаңаөзенде таңертең басталған шағын ереуіл жаппай наразылық толқынын тудырды. Маңғыстауда кешкі уақытта мыңдаған көлік иелері ынтымақтаса жолды жауып тастады.
Наразылықтарға тағы бірнеше ауылдың – Ақшұқыр, Қызылтөбе, Құрық және Шетпенің тұрғындары қосылды.
«Маңғыстау облысының тұрғындары газ бағасының күрт көтерілуіне байланысты жергілікті биліктің баға саясатымен келіспей отыр. Митингілер Жаңаөзен қаласында, Ақшұқыр, Құрық ауылдарында өтуде. Мыңдаған адам жолдарды жауып тастады. Газ 120 теңге болды, кеше Өзенде 98 теңгеден жанармай құйдық» деді куәгерлердің бірі.
Ақтаулықтар да газ бағасының қымбаттауына қарсы бейбіт шеру өткізді. Кездесу 11а ықшам ауданындағы перинаталдық орталыққа қарама-қарсы автотұрақта өтті.
Митингке 200-ге жуық автокөлік жүргізушілері жиналды. Олардың айтуынша, олар да жаңаөзендіктер сияқты сұйытылған газ бағасының күрт көтерілуіне наразы. Жүргізушілер газ бағасын 60 теңгеге дейін түсіруді талап етуде. Кездесуден соң барлығы тарқады.
Сондай-ақ Шетпе ауылының тұрғындары да өз наразылықтарын білдірді.
Ақтаулықтар екі жерде митинг ұйымдастырды. Тағы бір оқиға Приморский тұрғын алабында орын алды. Жанар-жағармай бағасының көтерілуіне тұрғындар да өз пікірлерін білдірді.
Жаңаөзендегі жұмысшылардың бір бөлігі газ бағасына байланысты ереуілге шығамыз деп қорқытты.
Жаңаөзендіктерге қолдау білдіріп, өзге облыстардың тұрғындары да наразылық білдірді.
3 қаңтарда үкімет президент Қасым-Жомарт Тоқаевтың тапсырмасы бойынша Жаңаөзендегі жағдайды реттеу бойынша шаралар қабылданатыны туралы ресми хабарлама таратты.
«Премьер-министр Асқар Маминнің өкімімен Маңғыстау облысының әлеуметтік-экономикалық жағдайын қарау жөніндегі үкіметтік комиссия құрылды. Мемлекет басшысының тапсырмасын орындау үшін үкімет сұйытылған мұнай газының бағасын реттеу бойынша кешенді шараларды жүзеге асырады» делінген Маминнің сайтында.
Сондай-ақ, Бәсекелестікті қорғау және дамыту агенттігінің бағаны бекіткені үшін жанармай құю бекеттері иелеріне қатысты тексеруді бастағаны айтылды. Маңғыстау облысындағы жанармай құю бекеттерінің қожайындары газ бағасын литріне 120 теңгеден 85-90 теңгеге дейін төмендетуге шешім қабылдағаны хабарланды. Алайда, наразылық білдірушілердің талабы өзгеріссіз қалды – бұрынғы 50-60 теңгені қайтару.
Премьер-министр Асқар Маминнің айтуынша, бағаның ұзақ мерзімді тұрақтылығын қамтамасыз ету және газ бағасының алыпсатарлық өсуіне жол бермеу үшін жүйелі шаралар жүзеге асырылатын болады. Бұл үшін олар баға диапазондарын құруды жоспарлап отыр. Бұл ретте үкіметтің жолдауында «Қоғамдық тәртіпті бұзуға байланысты оқиғаларға құқықтық баға беру шаралары қабылданатыны» айтылған.
Жаңалықтар
- «Атамекен» Кәсіпкерлер палатасының бұрынғы басшысы Абылай Мырзахметов алаяқтық жасағаны үшін бес жылға сотталды
- Өскеменде айғақтарды бұрмалаған полицей сотталды
- Бішкек шенеуніктері автобуспен жүретін болады
- Атырау облысы, Талдыкөл ауылында халықты эвакуациялау басталды
- Оның тамағын кеңсе пышағымен кесіп тастады: сот үкім шығарды
- Павлодар облысында педофил ұзақ мерзімге бас бостандығынан айырылды
- Феминистер Қуандық Бишімбаевтың үкіміне наразылық білдірді
- Сот Жәмила Маричеваны кінәлі деп танып, айыппұл салды
- Салтанат Нүкенованың ағасы сот үкіміне қанағаттанатынын айтты
- Бақытжан Байжанов 4 жыл бас бостандығынан айыру туралы шешімге разы емес
- Қуандық Бишімбаев 24 жылға сотталды
- Алматы тұрғыны өзге біреудің көлігін өртеп жіберіп, оны видеоға түсіріп алған
- Мемлекет басшысы Мәдениет және ақпарат министрі Аида Балаеваны қабылдады
- Атыраудағы су тасқынының шарықтау шегіне 4-5 күн қалды
- Қуандық Бишімбаев пен Бақытжан Байжановқа қатысты сот үкімі сағат 17:00-де шығады
- Шымбұлақ аспалы жолдарды жабады
- Қазақстан тағы да Ресейден үлкен арақ импорттаушы елге айналды
- Итті басып өткен депутат айыппұлмен құтылады
- «Семей орманындағы» өрт: қорық басшылығына үкім шығарылды
- Өзбекстан биыл Қазақстанға егістіктерді суару үшін 922 миллион текше метр су беруге уәде берді