Ғани Бейсембаев отставкаға жіберілді

Қазақстан президенті Қасым-Жомарт Тоқаевтың жарлығымен Ғани Бейсембаев оқу-ағарту министрі лауазымынан босатылды, деп хабарлайды Orda.kz.

Бұл туралы Ақорда хабарлайды.

«Мемлекет басшысының Жарлығымен Ғани Бектайұлы Бейсембаев Қазақстан Республикасының Оқу-ағарту министрі лауазымынан босатылды»,  деп хабарлайды Ақорда.

Бейсембаев – Абай атындағы Алматы мемлекеттік университетін бітірген, философия және психология ғылымдарының докторы. 1989 жылы Талғар ауданындағы №14 орта мектепте қазақ тілі пәнінің мұғалімі болып қызметін бастаған. Кейін Іле ауданындағы №12 мектепті, Қапшағай қалалық білім бөлімін, түрлі білім беру ұйымдарын, «Edtech-kz» орталығын және «Оқулық» республикалық орталығын басқарды. 2020 жылы Алтынсарин атындағы Ұлттық білім академиясының президенті болып тағайындалды.

2022 жылы оқу-ағарту вице-министрі болды. 2023 жылдың 4 қаңтарында президент Қасым-Жомарт Тоқаев оны министр қызметіне тағайындады.

Оның орнына мәжіліс депутаты Жұлдыз Сүлейменова тағайындалды.

«Мемлекет басшысының Жарлығымен Жұлдыз Досбергенқызы Сүлейменова Қазақстан Республикасының Оқу-ағарту министрі болып тағайындалды», деп хабарлады Ақорда.

Жұлдыз Сүлейменова мәжілістің жетінші және сегізінші шақырылымдарының депутаты болған. Сондай-ақ «Назарбаев Зияткерлік мектептері» АҚ-ның даму департаментін басқарған. Әл-Фараби атындағы Қазақ ұлттық университетінде білім алып, бакалавр, магистр және докторантура бағдарламаларын аяқтап, мәдениеттану мамандығы бойынша PhD ғылыми дәрежесін қорғаған.