Халықаралық қылмыстық сот Владимир Путин мен Бала құқықтары жөніндегі уәкіл Мария Львова-Белова украиндық балаларды заңсыз депортациялады деген күдікке ілінгенін түсіндірді.
Гаагадағы халықаралық қылмыстық сот Ресей президенті Владимир Путин мен бала құқықтары жөніндегі омбудсмен Мария Львова-Белованы қамауға алуға халықаралық ордер берді, деп хабарлайды BBC.
«Бүгін, 2023 жылдың 17 наурызында Халықаралық қылмыстық соттың екінші сотқа дейінгі палатасы Украинадағы жағдайға байланысты екі адамды қамауға алуға ордер берді, олар: Владимир Владимирович Путин мырза мен Мария Алексеевна Львова-Белова ханым» делінген Гаагадағы халықаралық қылмыстық сот таратқан баспасөз баянында.
Халықаралық қылмыстық сот Путин мен Львова-Белова украиндық балаларды заңсыз депортациялады деген күдікке ілінгенін мәлімдеді.
Бейсенбі күні Біріккен Ұлттар Ұйымының Тергеу комиссиясы украиндық балаларды Ресейге алып кетуді әскери қылмыс деп санауға болатынын жариялады.
«Ресей Федерациясының Президенті Владимир Владимирович Путин мырза […] халықты (балаларды) заңсыз депортациялау және Украинаның басып алынған аумақтарынан халықты (балаларды) заңсыз көшіру бойынша әскери қылмыстары үшін жауапты» деп нақтыланған баспасөз хабарламасында.
Халықаралық қылмыстық соттың судьялары Путиннің бұл қылмыстарға тікелей қатысушы ретінде де, қол астындағы қызметкерлері оның тікелей қатысуымен немесе қатысуынсыз бұл қылмыстарды жасаған басшы ретінде де жеке өзі жауапты деп санауға жеткілікті негіздер бар деп қосты.
Халықаралық қылмыстық сот Рим статуты, яғни 1998 жылы Римде қабылданған және 2002 жылы күшіне енген халықаралық шарт негізінде жұмыс істейді. Ресей бұл шартқа қол қойды, бірақ ратификацияламады. Ал президентті қамауға алуға ордер берілгені туралы жаңалықтарда ол оны «елеусіз» деп санайтынын айтты.
— Ресей Халықаралық қылмыстық соттың Рим статутының қатысушысы емес және ол бойынша міндеттемелер алмайды. Ресей бұл органмен ынтымақтаспайды және Халықаралық соттың қамауға алудың мүмкін болатын «рецептері» біз үшін заң жүзінде маңызды емес, – деді оның ресми өкілі Мария Захарова Ресей сыртқы істер министрлігінде өткен брифингте.
