Футбол жанкүйерлері президенттікке кандидаттарын тіркеуге қол жинай алмады

Қоғамдық бірлестік ұсынған Бақыт Жаңабаев небәрі төрт мың қол жинаған.

Қазақстанның Орталық сайлау комиссиясы «Қазақстандық футбол жанкүйерлер лигасы» қоғамдық бірлестігі ұсынған Бақыт Жаңабаевты президенттікке кандидат ретінде тіркеуден бас тартты.

Бақыт Жаңабаевты қолдау үшін Қазақстанның 15 өңірінде 58 889 қол жиналды, оның 4054-і ғана сенімді болып шықты. Қолдардың қажетті саны туралы конституциялық талап орындалмады.

ОСК талаптарына сәйкес кандидат тіркелу үшін кемінде 118 273 қол жинауы керек еді.

11 қазанда «Қазақстандық футбол жанкүйерлер лигасы» қоғамдық бірлестігі мемлекеттік қызметкер Бақыт Жаңабаевты Қазақстан Республикасы Президенттігіне кандидат ретінде ұсынды. Кандидат Орталық сайлау комиссиясына тіркелу үшін қажетті құжаттар топтамасын тапсырды.

Бақыт Жаңабаевтың айтуынша, 2001 жылдан бері мемлекеттік қызметте жұмыс істейді. Қазір үміткер ҚР Қаржы министрлігі Мемлекеттік кірістер департаменті қызметкері.

21 қазан, 18.15-тегі жағдай бойынша, елімізде ресми түрде алты үміткер тіркелген: Жигули Дайрабаев, Мейрам Қажыкен, Қасым-Жомарт Тоқаев, Қарақат Әбден, Салтанат Тұрсынбекова, Нұрлан Әуесбаев.

Қазақстанда кезектен тыс президент сайлауы 20 қарашада өтеді.