Футзалдан Қазақстан құрамасының бас бапкері «тұсау кесу» дәстүрін өткізді

Футзалдан Қазақстан құрамасының бас бапкері Рикардо Кака «Тұсау кесу» мерекелік шарасының құрметті қонағы болды.

Алматылық «Қайраттың» ойыншысы Біржан Оразовтың бір жасар ұлы Димашқа «Тұсау кесу» дәстүрін өткізуге арнайы шақырылды.

Кака-дан басқа Оразовтардың отбасылық мерекесіне Біржанмен бірге өнер көрсететін – Игита және Дуглас қатысты.

– Біржан Оразовқа және оның серіктесіне сүйіспеншілік пен құрмет белгісі үшін, сондай-ақ керемет әрі бағалы сыйлық үшін рахмет. Сіздерге жарқын болашақ тілеймін, – деп жазды жаттықтырушы өзінің Instagram парақшасында.

• «Тұсау кесу» – бала бесіктен белі шығып, еңбектеуден өткен соң, аяғын қаз-қаз баса бастағанда жасалатын рәсім. Өз аяғымен туған жерінің топырағын басып, із түсіріп, өз көзімен алдына қарап, таң-тамаша болады. Бұл кішкентай бөбектің ең алғашқы талпынысы, өзі жасаған тіршілігі. Осындайда дана қазақ баланың келешегіне ақ жол тілеп, «балам тез жүріп кетсін» деген ниетпен «тұсаукесер» тойын жасайды.