Футбол добының орнына кірпі: Ақтөбеде жігіттерге қатысты қылмыстық іс қозғалды

Ақтөбеде футбол добының орнына кірпіні тепкен жігіттерге қатысты қылмыстық іс қозғалды, деп хабарлайды Orda.kz порталы  ҚазТАГ-қа сілтей отырып.

«Адамдар анықталды, бірақ әлі полиция бөліміне жеткізілген жоқ. Жануарларға қатыгездік көрсету бойынша қылмыстық іс қозғалады», - деді Ақтөбе облыстық ІІД баспасөз қызметінің жетекшісі Ерболат Сарқұлов.

Әлеуметтік желіде футбол ойнап жүрген жас балалардың видеосы тарап кетті. Олар доптың орнына, тірі немесе өліп қалған кірпімен ойнаған.

Қазақстанда жануарларға қатыгездік көрсеткені үшін қылмыстық және әкімшілік жауапкершілік белгіленген. Қылмыстық кодекске сәйкес, жануарды кескілегені үшін айыппұл немесе түзеу жұмыстарына немесе 30 тәулікке дейін қамауға алынады. Жануарды өлтіргені үшін – бас бостандығынан айыруға және бас бостандығын шектеуге дейін қарастырылған.

16 мамыр күні кешкісін қылмыстық істің тіркелгені белгілі болды.

Естеріңізге сала кетейік, бір күн бұрын Зеренді ауданындағы «Аманат» партиясының депутаты Қайрат Ауғалиевке итті ұрғаны үшін 18 мың теңге айыппұл салынған болатын. Ит өліп қалған.

Биылғы жылдың наурыз айында Павлодарда мысыққа сірке суын шашқаны үшін әйелге 86 мың теңге айыппұл салынды. Мысық  аман қалды. Бұл қылмыстық құқық бұзушылық деп саналды.

Бұған дейін 2023 жылы марғауды еден жуатын таяқпен ұрып өлтіргені үшін Ақтау тұрғыны 100 сағат қоғамдық жұмысқа тартылса, 2022 жылы тағы бір жас жігіт жарты жылға шартты түрде бас бостандығынан айырылған болатын.