Футбол алаңында қаза болған полицейдің әйелі полициядан 14 млн теңге өндіріп алды

Түркістан облысында сот полиция департаментін спорттық жарыс кезінде қаза тапқан полицейдің жесір қалған әйеліне өтемақы төлеуге міндеттеді, деп хабарлайды Orda.kz.

Сот 2024 жылдың соңында аяқталғанымен, бұл туралы облыстық соттың баспасөз қызметі бүгін ғана хабарлады.

Полиция капитаны Ержан Түлешов 2022 жылдың 6 қазанында Жетісай қаласында өткен футбол ойыны кезінде қайтыс болған. Ойын барысында оның жүрегі тоқтап қалған. 

Облыстық полиция департаменті бірден жауапкершіліктен бас тартты. Полицейдің қазасына байланысты қылмыстық іс тоқтатылып, адам қызмет бабында емес, футбол ойнау кезінде қайтыс болды деген уәжбен отбасына өтемақы төлеуден бас тартылды. Алайда марқұм Түлешовтің әйелі сотқа жүгінді. Сотта ол күйеуі көз жұмған спорттық турнир полицейлердің қызметтік дене дайындығы ретінде есептелетінін дәлелдеді. Бұл жарысты өткізу туралы бұйрыққа Жетісай аудандық полиция басқармасының бастығы, полиция полковнигі Сапарбеков қол қойған.

Қаза болған полицейдің басшылығы сотта соңына дейін қарсыласқан. Олар Ержан Түлешовтің отбасына 14 миллион теңге өтемақы төлеуден бас тартқысы келген. 

«Сот Е.Т.Түлешовтің спорттық шараға қатысуы оның қызметтік міндетін орындау аясында болған деген қорытындыға келді. Сондықтан талап қоюшының талабы қанағаттандырылуы тиіс. Өлім қызметтік міндетін орындау кезінде болған деп танылсын. Қазақстан Республикасы Үкіметінің 2012 жылғы 12 қазандағы №1301 қаулысына және "Құқық қорғау қызметі туралы" Заңның 66-бабына сәйкес, қызметтік міндетін атқару кезінде қаза тапқан қызметкердің мұрагерлеріне 60 лауазымдық жалақы көлемінде біржолғы өтемақы төленуі тиіс» деп жазылған сот шешімінде. 

Полиция капитаны Түлешовтің соңғы айлық жалақысы 247 242 теңге болған. Демек, өтемақы сомасы мынадай есеппен шықты: 247 242 × 60 = 14 834 520 теңге. Түркістан облысы полиция департаменті сот шешіміне шағым түсірмеді. Үкім заңды күшіне енді.

Облыстық соттың баспасөз қызметінің мәліметінше, Ержан Түлешов — 2008 жылдан бастап ішкі істер органдарында қызмет етіп, осы уақыт ішінде түрлі мемлекеттік наградалармен марапатталған. Артында төрт баласы қалды.