Француздар Қазақстанда АЭС салуға қызығушылық танытып отыр

«Самұрық-Қазына» АҚ Мемлекеттік ұлттық әл-ауқат қорының басшылары мен француздық Orano компаниясы Қазақстандағы атом саласын дамыту мәселесін талқылады.

Кездесу кезінде Франция тарапы Қазақстанда таза энергия көзі ретінде атом электр стансасын салу жоспарына үлкен қызығушылық танытқан.

«Қазір бұл бастама пысықталып жатыр, түпкілікті шешім әлі қабылданады. Қалай болғанда да, біз энергия көздерін әртараптандырып, теңгерімді энергетика құруымыз керек, яғни тек атомды ғана емес, газды да, сонымен қатар жаңартылатын генерацияны да дамытуымыз керек» деді «Самұрық-Қазына» АҚ басқарма төрағасы Алмасадам Сәтқалиев.

Келіссөздердің негізгі тақырыбы Қазақстанның оңтүстігінде уран өндіретін KATCO бірлескен қазақстандық-француз кәсіпорнының жұмысы болды. Тараптар цифрландыруды көбірек енгізу және шешім қабылдау процесін жеңілдету қажеттігін атап өтті.

KATCO өнеркәсіптік нысандарын пайдалану үшін Orano өңірде энергия сақтау жүйесімен жабдықталған, «Самұрық-Қазына» АҚ төмен көміртекті дамуға көшу жоспарларына толық сәйкес келетін 12 МВт күн электр стансасын салуды ұсынды.

Сонымен қатар, тараптар күкірт қышқылын өндіру жобасын жүзеге асыру перспективаларын, Orano-ның шетелдік жобаларына бірлескен инвестиция тарту мүмкіндіктерін талқылады.

Orano (бұрынғы Areva) — француз трансұлттық корпорациясы, ядролық отын өндірісі бойынша әлемдік көшбасшылардың бірі. «КАТКО» БК» ЖШС – «Қазатомөнеркәсіп» ҰАК» АҚ («Самұрық-Қазына» АҚ құрамына кіреді) және «ORANO Mining» АҚ бірлескен кәсіпорны. КАТКО Түркістан облысындағы Мойынқұм кен орнында уран өндіреді. Ол әлемдегі ең ірі уран өндіруші кәсіпорындардың бірі.