Францияда Макронның зейнетақы реформасына қарсы наразылықтар жалғасуда

Кәсіподақтар 7 наурызда «Францияны тоқтатамыз» деп қорқытады.

Франция кәсіподақтары Эммануэль Макронның зейнетақы реформасына қарсы ереуілдерін жалғастыруда, деп хабарлайды France24 телеарнасы.

Сегіз жетекші кәсіподақ бастаған тұрғындар зейнет жасын 62-ден 64-ке көтерілгеніне наразылық білдіруде. Демонстранттар қолдарына плакат ұстап,  әдеттегі маршрут бойынша Республика алаңынан Ұлт алаңына дейін жүріп өтті.

Кәсіподақтар егер билік шерушілердің талаптарын елемейтін болса, 7 наурызда «Францияны тоқтатуға» ниетті екендерін айтты.

Франция Ішкі істер министрлігінің есебіне сәйкес, ел бойынша шеруге 963 мың адам шықты. Оның 93 мыңы Париж көшелеріне шыққан.