Франция Әбіләзовке қарсы істі қайта бастады

Францияның кассациялық соты апелляциялық соттың қазақстандық қашқын банкир Мұхтар Әбіләзовке қатысты сот ісін тоқтату туралы шешімін жарамсыз деп тапты.

mediapart.fr сайтының хабарлауынша, Әбіләзов қаржы жымқырды деп айыпталған.

«Бас прокурордың апелляциялық шағымына байланысты сот Париж апелляциялық сотының Тергеу палатасының 2022 жылғы 13 қаңтардағы шешімінің барлық тармақтарын алып тастау туралы шешім қабылдады және істі қайта қарауды талап етеді» деп хабарлады кассациялық сот.

Қазақстанда сот Мұхтар Әбіләзовті қылмыстық қауымдастық құрып, БТА банкінің қаржысын жымқырды, келтірілген шығын 7,5 миллиард доллардан асады деп айыптаған. Ол басқаратын тіркелмеген «Қазақстанның демократиялық таңдауы» қозғалысы республикада экстремистік ұйым деп танылды. Сонымен қатар, Әбіләзов 2004 жылы бизнес серіктесі Ержан Тәтішевті өлтіргені үшін сырттай өмір бойына бас бостандығынан айырылған.

Бұрынғы банкир Францияда. 2022 жылдың желтоқсанында Францияның босқындар ісі жөніндегі ұлттық соты (CNDA) Мұхтар Әбіләзовке саяси баспана беруден бас тартқаны белгілі болды.

2023 жылдың 18 қаңтарында Бас прокурордың орынбасары Әсет Шындалиев Мұхтар Әбіләзовті неліктен экстрадициялау мүмкін еместігін түсіндірді. Оның айтуынша, экстрадициялау мәселесі Франциямен тиісті келісімнің жоқтығынан туындап отыр.

2023 жылдың 7 наурызында Францияның Экс-ан-Прованс қаласының апелляциялық соты Мұхтар Әбіләзовке сотқа келмегені үшін айыппұл салу туралы шешім шығарды.