Францияда «ПСЖ»  жеңісінен кейінгі тәртіпсіздік белең алып, жүздеген көлік өртенді, екі адам қаза тапты, 190 адам жараланды

Францияда Чемпиондар лигасындағы «ПСЖ» жеңісін атап өту кезінде болған тәртіпсіздіктер салдарынан екі адам қаза тапты, деп хабарлайды Orda.kz Le Figaro басылымына сілтеме жасап.

Басылымның мәліметінше, ел бойынша тәртіпсіздіктерге байланысты ұсталғандар саны 559 адамға жетті, оның 490-нан астамы Парижде ұсталған.

Жалпы тәртіпсіздіктерден 190-ға жуық адам зардап шеккен, олардың ішінде 22 полиция қызметкері мен жеті өрт сөндіруші бар. 692 өрт қою оқиғасы тіркелді, оның ішінде 264-і көлік құралдарына қатысты.

Сондай-ақ басылым екі адамның қаза тапқаны туралы жазады. БАҚ мәліметінше, Парижде мотоцикл мінген әйелді мереке кезінде көлік қағып көз жұмған. Ал Дакс қаласында тәртіпсіздіктер кезінде 17 жастағы жасөспірімді пышақтап кеткен.

Полицияның хабарлауынша, тәртіпсіздікке қатысушылар тәртіп сақшыларына тас лақтырған, сондықтан полиция жарық-шу гранаталарын қолдануға мәжбүр болған.

Лорьян қаласында тәртіп бұзушылар дүкендерді тонауға кіріскен, ал Нантта топ автобуска шабуыл жасаған. Полиция шабуыл жасағандардың барлығын жедел ұстады.

Еске сала кетсек, өткен түні Францияның «Пари Сен-Жермен»  коммандосы Чемпиондар лигасының финалында Италияның «Интер»  клубын 5:0 есебімен ойсырата жеңді. Бұл — Чемпиондар лигасы финалындағы ең ірі жеңіс.

Париждік клуб тарихта алғаш рет Чемпиондар лигасын ұтты. Бұған дейін астана командасы финалда тек 2020 жылы өнер көрсетіп, Германияның  «Бавариясынан»  жеңілген болатын.

Осыдан кейін Франция бойынша мыңдаған жанкүйерлер «ПСЖ» жеңісін тойлау үшін көшеге шықты, елді тәртіпсіздік жайлады. Автокөліктер жанкүйерлер тобына соғылып, ондаған адамның жарақат алғаны хабарланған.