Францияда екпе салдырмаған қызметкерлер жұмыстан қуылды

Францияда коронавирусқа қарсы екпе салдырмаған үш мыңға жуық медицина қызметкері жұмыстан шеттетілді.

Үкіметтің дәрігерлер үшін міндетті екпе салдыру туралы өкімі бірнеше апта бұрын жарияланған. Алайда көпшілік биліктің бұл сөзін аса ерен санамаса керек. Ондай қатаң шара қолданылатынына сенімсіздік болған.  Жаппай шеттетілуден кейін кәсіподақтар кадр тапшылығын айтуда. Билік жағдай бақылауда деп сендіргенімен кейбір ауруханаларда шұғыл шаралар қабылдауға тура келіпті.

 — Біз бөлімшелердің секцияларын жабамыз, штаттан тыс қызметкерлерді тартамыз, медицина қызметкерлерінен артық жұмыс істеуді сұраймыз, – дейді жергілікті емхана өкілі.

Үш мың медицина қызметкерінің келісімшартын уақытша тоқтату – бұл жалпы Еуропа үшін бұрын-соңды болмаған «өрескел» жағдай.

Бұған дейін Францияда вакцина салдыруға қарсы наразы топқа шабуыл жасалғанын естеріңізге саламыз.  Тулуза қаласында «вакциналау паспорты керек емес» деген наразы топ екпе салдырғандардың қарсылығына тап болып, соққыға жығылған.