Франция лаңкестік қаупінің ең жоғары деңгейін енгізді

Өткен аптаның соңынан бері елде палестиналық-израильдік қақтығысқа байланысты наразылық шерулері өтіп жатыр.

Франция Таяу Шығыстағы оқиғаларға байланысты «төтенше шабуыл» дабылы – лаңкестік қауіп-қатердің ең жоғары деңгейін жариялады, деп хабарлайды Franceinfo.

13 қазанда пышақпен қаруланған 20 жастағы Кавказ тумасы Францияның солтүстігіндегі Гамбетта лицейіне басып кірген. «Аллаһу әкбар» деп айғайлап, мұғалімді өлтіріп, үш адамды жаралады. Шабуылдаушы мен оның бірнеше туыстары ұсталды.

Ішкі істер министрі Джералд Дарманин: «Біздің ақпаратымыз бойынша, Таяу Шығыста болған оқиға мен бұл әрекеттің арасында байланыс бар екені сөзсіз», - деді.

«Шабуыл Израильдің оңтүстігіндегі Хамас шабуылына және екі жақтан жүздеген бейбіт тұрғынның өмірін қиған Израильдің әскери әрекетіне байланысты әлем бойынша шиеленістің күшеюі тұсында жасалды» деп хабарлайды France24.

Израильдің Газа секторын қарқынды бомбалауына байланысты мұсылман елдерінде жаппай наразылық шерулеріне шақырулар болды.

Францияда өткен аптаның соңынан бері Палестинаға қолдау көрсету шерулері өтіп жатыр. Бір күн бұрын елдің ішкі істер министрі Джеральд Дарманин қоғамдық тәртіпті бұзуға байланысты Палестинаны қолдайтын кез келген шерулерге тыйым салған болатын.

Сонымен бірге Францияның әртүрлі қалаларында жергілікті билік Израильді қолдайтын шерулерге рұқсат берді.

Франция әлемдегі еврей халқының саны бойынша Израиль мен АҚШ-тан кейін үшінші орында және Батыс Еуропадағы ең көп мұсылман халқына ие.