Forbes тізіміндегі қазақстандық кәсіпкерге іздеу жарияланды

Forbes нұсқасы бойынша 50 байдың тізіміне енген қазақстандық кәсіпкер Анатолий Балушкинге іздеу жарияланды.

Бұл туралы Orda.kz хабарлады.

Кәсіпкерді іздеу туралы хабарландыру Бас прокуратураның Құқықтық статистика және арнайы есепке алу комитетінің сайтында «Қылмыскерлерді іздеу» бөлімінде пайда болды. Іздеуде жүргендердің себептері айтылмайды, алайда, сайт ақпараты бойынша Балушкин тергеуден қашып кеткен.

Asia Auto сайтының мәліметінше, Анатолий Балушкин - Bipek Auto - Asia Auto компаниялар тобының директорлар кеңесінің төрағасы.

Ол Forbes журналы бойынша 2020 жылдың желтоқсанындағы Қазақстандағы ең ықпалды 50 кәсіпкер тізіміне енген. Оның байлығы 153 млн долларға бағаланды.

Еске салсақ, Нұр-Сұлтанның мамандандырылған ауданаралық экономикалық соты Индустрия және инфрақұрылымдық даму министрлігінің Asia Auto автокөлік құрастырушы компаниясына қатысты талап арызын қанағаттандырды. Сот Asia Auto-ға мемлекетке шамамен 174 млрд теңгені қайтаруды міндеттеді.