Flydubai Қазақстанға, Ресейге және бірқатар елдерге ұшуларды тоқтатты

Біріккен Араб Әмірліктерінің мемлекеттік әуе компаниясы Flydubai бірқатар бағыттар бойынша, оның ішінде ТМД елдеріне ұшуларды уақытша тоқтатты, деп хабарлайды Orda.kz.

Бұған Израиль мен Иран арасындағы қақтығыс себеп болды.

«Армения, Әзірбайжан, Беларусь, Грузия, Иран, Ирак, Израиль, Иордания, Қазақстан, Қырғызстан, Ливан, Ресей, Сирия, Тәжікстан, Түрікменстан және Өзбекстан елдеріне 13 және 14 маусым күндеріне жоспарланған рейстер тоқтатылды» деп жазылған хабарламада. 

Компанияның баспасөз қызметі жағдайды мұқият бақылап отырғандарын және рейстер кестесін соған сәйкес реттеп отырғандарын атап өтті.

«Біз жолаушыларымызға келтірілген кез келген қолайсыздықтар үшін кешірім сұраймыз. Жолаушылар мен экипаждың қауіпсіздігі – біздің басты басымдығымыз», – деді Flydubai өкілі. 

Бұған дейін екі қазақстандық әуе компаниясы жолаушыларды Иран мен Ирак әуе кеңістігін айналып ұшу және ұшу мен қону уақытының өзгеруі мүмкін екендігі туралы ескерткен болатын.

2025 жылғы 13 маусым күні таңертең Израиль Иранның ядролық және әскери инфрақұрылымына  соққы жасады. Шабуыл салдарынан Иран Ислам революциясы күзет корпусы (КСИР) Бас штабының бастығы Хоссейн Салами және Азад Ислам университетінің президенті Мохаммад Техранчи қаза тапты.

Таяу Шығыстағы жағдайдың ушығуына байланысты Қазақстан Республикасының Израильдегі елшілігі Израиль аумағындағы қазақстандықтарға арналған шұғыл хабарлама жариялады.