FlyArystan жолаушыдан 9,5 млн теңге өндіріп алды

FlyArystan әуе компаниясы ұшақтың төтенше жағдайда ғана ашылатын есігін ашқан жолаушыдан 9,5 миллион теңге өндіріп алды, деп хабарлайды Orda.kz.

FlyArystan Шымкенттен Алматыға қарай ұшқан ұшақтың бүйіріндегі есікті ашып жіберген жолаушыны сотқа берген. Нәтижесінде Алматы қаласы Түрксіб аудандық соты әуе компаниясының пайдасына 9 млн 551 мың теңге шығын өндіру туралы шешім  шығарды. 

«Оқиға 2023 жылдың 23 желтоқсанында, Шымкент-Алматы бағытында ұшқан KC7106 рейсінде болды. Ұшақ қонғаннан кейін, жолаушылардың бірі 12-ші қатарда орналасқан және тек төтенше жағдайларда ғана ашуға арналған есікті ашып жіберген. Осылайша, әуе компаниясына 9 551 922 теңге көлемінде шығын келді»,  делінген әуе компаниясының баспасөз қызметі таратқан хабарламада.