FlyArystan мүмкіндігі шектеулі жолаушыдан кешірім сұрады

Әуе компаниясы жақын арада Алматыдан Қарағандыға мүгедектер арбасын жеткізіп бермек.

FlyArystan компаниясы мүгедек жолаушыдан арбасын бортқа кіргізбегені үшін кешірім сұрады. Бұл туралы Facebook желісінде жолаушы Нияз Сүндетәлиев жазған болатын.

«Әуе компаниясы өз кінәсін толығымен мойындап, кешірім сұрады. Қазір Алматыда қалған мүгедектер арбасы жақын арада Қарағандыға ұшақпен жеткізіледі. Мен ваучерден, сондай-ақ авиакомпания ұсынатын барлық нәрселерден бас тарттым. Маған ол  маңызды емес. Маған маңыздысы -  мүгедектерге әуежайда, ұшақ бортында әрқашан көмек көрсетілетініне және кез келген жағдайдың бір күнде емес, дәл сол жерде шешім болатыныны. Менің басымнан өткен жағдай өкінішке қарай,  солай болды» деп атап өтті Нияз Сүндетәлиев.

Қарағанды ​​тұрғыны бұл жағдайдан кейін әуе компаниясының қызметкерлері тиісті қорытынды шығаратынына және  кез келген жағдайда адамдық танытатынына сенімді.

Әуе компаниясы қызметтік тексеру жүргізгенін және жолаушыдан  кешірім сұрағанын жеткізді.

«Сондай-ақ қателік жіберген қызметкерге қосымша оқыту жүргізіледі деп сендіреміз. Жолаушыға арбаны Қарағандыға және тұрғылықты мекенжайына жөнелтуге міндетті түрде жан-жақты көмек көрсетіледі. FlyArystan мұндай қателіктердің алдын алу үшін барлық шараларды қабылдайды» делінген FlyArystan Facebook парақшасындағы түсініктемеде.

Бұған дейін Нияз Сүндетәлиев Алматы әуежайында FlyArystan қызметкерлерінің бортқа мүгедектер арбасына кіргізгісі  келмейтіні туралы жазған болатын.  Оның арбасы  Алматыда қалып, өзі Қарағандыға келіп үйінен шыға алмай қалған. Әуе кемесінің бортында жолаушы жарамсыз мүгедектер арбасына отыруға мәжбүр болды.