FlyArystan Мақпал Жүнісованы домбырамен ұшаққа кіргізбеді

FlyArystan әуе компаниясы танымал әнші Мақпал Жүнісованы домбырасымен ұшаққа кіргізбей, әлеуметтік желіде жанжал тудырды, деп хабарлайды Orda.kz.

Әнші Instagram парақшасында домбыраға арналған қосымша орынның бағасы 59 мың теңге болғанын айтып, шағымданды.

«Домбыра деп көрсетпесе де, оны 59 мың теңгеге әрең өткіздік. Осымен үшінші рет сондай жағдайға тап болып отырмын», – деді Мақпал Жүнісова.

FlyArystan әншінің шағымына жауап беріп, музыкалық аспаптарды тасымалдау бойынша ереже бар екенін түсіндірді. Ережеге сай, аспапты салонға алып өтуге тек қол жүгі ретінде рұқсат беріледі, егер оның салмағы 5 келіден аспаса және көлемі 56x23x36 см-ден үлкен болмаса. Басқа жағдайда қосымша орын үшін ақы төлеу қажет.

«Біз барлық өнер иелерінің еңбегін жоғары бағалаймыз және халқымыз үшін қасиетті домбыраның құндылығын түсінеміз. Дегенмен, барлық жолаушыларға тең қарым-қатынас көрсету және ортақ ережелерді сақтау – қауіпсіздікті қамтамасыз етудің кепілі» делінген FlyArystan хабарламасында.