Fly Arystan жолаушылардың құқығын бұзғаны үшін жазалануы мүмкін

Алматы қаласының авиациялық көлік прокуратурасы әуе компаниясын тексеріп, бірқатар заң бұзушылықтарды анықтады.

Жолаушылар балаларына халықаралық рейстерге билетті толық бағаға сатып алған болып шықты. Компания 2 жастан 12 жасқа дейінгі кәмелетке толмаған жолаушылар үшін арнайы 50% жеңілдіктерді қолданбаған.

2022 жылдың қаңтар-қазан айлары аралығында 3 мыңнан астам кәмелетке толмаған балалар стандартты тарифтер бойынша халықаралық бағыттарға жеткізілді.

«Прокуратураның ұсынысы бойынша Азаматтық авиация комитеті авиакомпанияға қатысты ӘҚБтК-нің 571-бабының 1-бөлігі бойынша әкімшілік хаттама жасады. Жиналған материалдар Алматы қаласының әкімшілік құқық бұзушылық істері жөніндегі мамандандырылған ауданаралық сотында қаралды» деп хабарлайды көлік прокуратурасының баспасөз қызметі.

Сот үкімі әлі заңды күшіне енген жоқ.