Фильмдерді мемлекеттік тілге дубляждау міндеттеледі

Мәдениет және спорт министрлігі «Кинематография туралы» заңға өзгерістер енгізбек. Енді фильмдердің түпнұсқасын міндетті түрде қазақ тілінде дубляждау талабы қойылады.

Бұл туралы Orda.kz Мәдениет министрлігі сайтына сілтеме жасап хабарлайды.

Заң жобасы Үкіметте биыл қазанда қаралады деп жоспарланған. Кейін заң желтоқсанда Парламент Мәжілісінің қарауына жіберіледі. Заңды қабылдау  жол картасына сәйкес 2022 жылы жоспарланған.

– Қазіргі уақытта мүдделі органдар, қоғамдық ұйымдар өкілдерінен және кинематография қайраткерлерінен жасақталған жұмыс тобы құрылды. Бүгінде жұмыс тобы 10-нан астам отырыс өткізді. Онда кинематографияның кинокомиссияларды құру тетігі, фильмдерді қазақ тіліне дубляждау бөлігіндегі өзекті мәселелер талқыланды. Орындалуы алдағы уақытта да жобалық кеңсе арқылы қадағаланады, - делінген хабарламада.