Фермерлерге арналған цифрлық жүйені қолдауға 150 млн теңге жұмсалды

Фермерлерге арналған цифрлық жүйені қолдауға 150 млн теңге жұмсалатыны жайлы ауыл шаруашылығы министрлігінің мемлекеттік қызметтерді дамыту және цифрландыру департаментінің басшысы Бернат Алпысбеков айтты деп хабарлайды Orda.kz.

Орталық коммуникациялар қызметінде өткен брифингте журналистер фермерлердің Gosagro жүйесіне жиі шағымданатынын атап өтті.

Фермерлерге субсидия беретін мемлекеттік платформа ақауларын болдырмау үшін қандай жұмыстар атқарылып жатқанына Бернат Алпысбеков тоқталып өтті.

«Шынында да, өткен жылы жерлерді цифрландыру мен ғарыштық мониторингке қатысты үлкен мәселе болды. Сондықтан фермерлерге уақытша жеңілдік енгізу туралы шешім қабылданды. Биыл ғарыштық мониторинг пен жерлерді цифрландыру талап етілмейді. Бұл былтырғы мәселе еді. Ал жүйедегі ақауларға келсек, биыл жүйеде ақау болған жоқ. Барлық субсидиялар уақытында төленіп жатыр», – деп сендірді Алпысбеков.

Сонымен қатар, оның айтуынша, биыл жүйені сүйемелдеуге, онда тіркелген 90 мың пайдаланушыға қызмет көрсетуге шамамен 150 млн теңге бөлінген. Бұл сомаға қаржы институттары, ауыл шаруашылығы басқармалары, техникалық қолдау көрсетумен айналысатын кредиттік серіктестіктердің, соның ішінде жергілікті жерлердегі қызметкерлердің еңбекақысы кіреді.