Фейсбуктың бұрынғы жоба менеджері мәлімдеме жасады

Фейсбукке тиесілі әлеуметтік желілердің уақытша істен шығуы – алып компанияның цифрлік және контент саясатына қатысты ақпараттың тарауына соқтырды.  

Бұл туралы Orda.kz 24.kz-ке сілтеме жасап хабарлайды.

Фейсбуктың бұрынғы қызметкері Френсис Хоган компанияның басты мақсаты – желі қолданушыларының қауіпсіздігі емес, қаржылық пайда табу екенін айтты. Сенат тыңдауына қатысқан Френсис фейсбукқа тиесілі инстаграм әлеуметтік желісінің жас қолданушыларға, әсіресе бойжеткендерге кесірі туралы мәлімдеп, реформа жасауға шақырды.

Оның айтуынша, фейсбук платформасында денсаулық сақтауға қатысты жалған ақпараттың тарауы – компания өнімдерін өткізудің құйтырқы жолы. Әрі осал топтарға манипуляция жүргізу де кеңінен қолданылып келген-мыс. Осы орайда сенаторлар Цукербергтің өзі алдағы уақытта Конгресс алдында жауап беруге тиіс деп отыр.

– Менің бұл жерге келіп, куәлік етуімнің басты себебі – фейсбуктың біздің қоғам үшін қаншалықты қауіпті екендігін түсіндіру. Ең алдымен біздің балаларымыз бен демократиямыз үшін қауіпті. Бұл компанияның күші шектен шығып барады. Қазіргі кезде фейсбук темекі сияқты деңгейге жетті. Жас балалар өз-өзін ұстай алмай отыр. Инстаграмнан бас алмайды. Ал ол желіге кірген адам үлкен манипуляцияға ұшырайды. Тіпті фейсбук салдарынан ажырасып жатқан отбасылар бар. Сонымен қатар фейсбуктың жүргізіп отырған саясаты – Эфиопия сияқты елдерде этникалық зорлық-зомбылық тудыруда, - деді фейсбуктың бұрынғы жоба менеджері Френсис Хоган.