ФБР Капитолийдегі бүліктің артында шетел қаржысы бар деп күдіктенуде

АҚШ Федералды тергеу бюросы (ФБР) 6 қаңтардағы орын алған тәртіпсіздіктің артында шетел қаржысының бар-жоғын тексеруде, деп хабарлады NBC телеарнасы. Арна тілшілері бұл ақпаратты алу үшін екі адамды сөзге тартқан. Олардың біреуі ФБР-дің қазіргі қызметкері болса, екіншісі бұрынғы қызметкері.

6 қаңтардағы оқиғаға қатысы бар адамдарға биткоин түрінде қаржы аударылғаны ФБР-дің  назарына іліккен. Себебі, Капитолийді басып алу ісі бойынша күдікті саналатын адамдардың есеп-шотына биткоин түрінде 500 мың доллар аударылған екен.

Телеарна хабарында бұл қаржы операциясының артында Франция азаматы тұрған болуы мүмкін делінген. Қаржы төлемдерінің барлығын криптовалютамен ақша аударуды сараптаушы мамандар құжаттаған.

Естеріңізге сала кетсек, Конгрестің қос палатасы 6 қаңтар күні президент сайлауы нәтижесін бекіту мақсатымен ортақ отырыс өткізбекші болды. Сол күні АҚШ-тың қазіргі президенті Дональд Трамп жақтастарымен Ақ үй жанында митинг өткізіп, сайлау нәтижесін мойындамайтынын мәлімдеді. Митингіден кейін Трамп жақтастары Конгресс отырысы басталған Капитолийге шабуыл жасады. Оқиға салдарынан бес адам қайтыс болды.