Facebook, Twitter және Youtube Дональд Трамптың аккаунтын блоктап тастады

Вашингтонда болған жаппай тәртіпсіздікке байланысты Instagram, Facebook, Twitter және Youtube Дональд Трамптың аккаунтын блоктап тастады.

7 қаңтарда Instagram мен Facebook Трамптың аккаунтын 24 сағатқа, ал Twitter 12 сағатқа блокқа қойды. Аталған  әлеуметтік желілермен бірге Youtube те Трамптың Капитолий маңында жақтастарына жолдаған видеоүндеуін көрсетпей қойды.

Әлеуметтік желілердің әкімшілігі бұл әрекеттер олардың талаптарын бұзатынын мәлімдеді.

Яғни, АҚШ-тың қазіргі  президенті осы уақыт аралығында аталмыш платформаларда ештеңе жариялай алмайды.

Кеше АҚШ конгресі сайлаушылардың даусын есептеп, 2020 жылғы президент сайлауының қорытындысын шығару үшін жиналған болатын.

Осыны пайдаланғысы келген  Дональд Трамп жақтастары жаппай наразылық акциясын өткізіп,  оған қатысқандардың  бір тобы конгресс ғимаратына басып кірген еді.

Бұдан бұрын Дональд Трамп Вашингтонда  мыңдаған адам жиналған митингте сөз сөйлеп, өзінің жеңілгенін мойындамайтынын айтты. Ол өз жақтастарын  Капитолий ғимаратына барып, наразылық білдіруге шақырды. Сол күні өріс алған оқиғалар салдарынан билік Вашингтонда коменданттық сағат енгізді.

Коменданттық сағат жарияланғаннан кеін АҚШ президенті Дональд Трамп тұрғындарды бейбіт әрекет етуге шақыра бастады. 

«Өтініш, біздің астаналық полицейлер мен тәртіп сақшыларын қолдаңыздар. Олар расында біздің жағымызда. Бейбіт әрекет етіңіздер!», - деді Ақ үй басшысы Twitter желісіндегі парақшасында. 

Артынша Конгресс күзеті Трамптың жақтаушыларының бірі – әйел адамның кеудесіне оқ атқаны белгілі болды.  Жарақат алған әйел шұғыл түрде ауыр халде  Капитолийден эвакуацияланды. Жергілікті БАҚ мәліметінше, ол ауруханада қайтыс болған. 

Көп ұзамай Трамптың негізгі қарсыласы Джо Байден мәлімдеме жасады. Ол бұл оқиға тәртіпсіздік емес, бүлік екенін айтты. 

«Мен Трампты қазір ұлттық теледидар арқылы шығып, антын орындауға, Конституцияны қорғауға және тәртіпсіздіктің аяқталуын талап етуге шақырамын»,  деді Байден. 

Кейіннен Капитолий ғимаратынан Трамптың жақтастарының барлығы шығарылғандығы белгілі болды.